Ачык һавада шайбалы хоккей уены, тимераякта шуу, гадәттә, кышның салкын көннәренә туры килә. Алдан планлаштырып,  каникул  көннәрендә Фома урта гомумбелем  мәктәбе базасында район мәктәпләренең 6-9 класс укучылары командалары арасында хоккей буенча иптәшләрчә очрашу булды.Фомалылар кунакларны хоккей мәйданын кардан тазартып, ихлас күңелдән каршылады. Эшнең бу ягына килгәндә, хуҗаларга–Фома урта мәктәбе укытучылар коллективына , физик культура укытучысына, үсмер егетләргә, өлкән сыйныф укучыларына таякның юан башы эләгә. Алар көче белән мәктәп ихатасындагы хоккей мәйданчыгы, һава торышының нинди булуына карамастан, һәрвакыт тәртиптә тотыла. Шуңа биредә малайлар кышкы каникул көннәрендә иртәдән кичкә кадәр, ачыгуларын да онытып, тимераякта шуды, хоккей уйнады.

Спорт сөючеләрне муниципаль  район мәгариф бүлеге начальнигы Линар Нурислам улы Маняпов  тәбрикләп, уенчыларга уңышлар теләде.

Үткән елларда да тирә-як күрше авыллардан   хоккей командалары Фомага килеп, көчен сынаганы бар иде.   Бу юлы  да Фомада спортны, атап әйткәндә, шайбалы хоккейны үстерүгә, яшь буынны сәламәт тәрбияләүгә, спортта чыныктыруга зур әһәмият бирелүенә шаһит булып, уеннарның яхшы дәрәҗәдә оештырылуыннан канәгать калдылар . Шулай итеп,  хоккей чемпионатын  беренче туры    уңышлы үтте.