Узган атнада күренекле мәгърифәтче, галим Ибраһим Хәлфин истәлегенә багышланган IX Республика фәнни-эзләнү укучылар конференциясендә катнашып кайттык. Укытучым  Г.Д.Әһлиуллина җитәкчелегендә бәйгегә әзерләнгәндә, мин үзем өчен күп яңалык ачтым. Алабугада туган якташыбыз рәссам И.И.Шишкин тормышын һәм иҗатын өйрәнеп, һәрбер нәрсәдә матурлык күрә белергә, тормышка шатланып яшәргә  өйрәндем. Конференциядә чыгыш ясаучыларны тыңлап та күп кызыклы мәгълүмат белдем.  Безнең секциядә бер укучы кәгазьдән оригами ясау серләре белән уртаклашты, икенчеләр агач кашыклар турында сөйләп кенә калмадылар, уйнап та күрсәттеләр. Күпчелек рус һәм татар халкының милли бәйрәмнәре турында чыгыш ясады. Бер-беребезгә сораулар бирдек, шуңа бәйге бик кызык үтте. Юлдашым Нурлат шәһәре 1 нче урта мәктәпнең 9 сыйныф укучысы Габдрахманова Айгөл дә (укытучысы Ф.М.Нәбиуллина) минем кебек бәйгедә катнашучы шаһәдәтнамәсе (сертификат) белән бүләкләнде. Фәнни эш белән шөгыльләнү мавыктыргыч һәм файдалы икән.

Гөлшат Гайсина, 5 нче сыйныф укучысы.