Тукай – үзенең исеме һәм иҗаты белән татар әдәбияты тарихында урынны иң түрдән алган, әдәбият күгендәге иң якты йолдыз. Ул калдырган әдәби мирас, андагы рухи байлык – милләтебез горурлыгы. Тукай – буыннар шагыйре. Татар халкы булган җирдә Тукай бар, татар халкы яшәгәндә Тукаебыз да яшәячәк.

          23 апрель көнне Зирекледә “Без Тукай оныклары” исемле районкүләм шигырь бәйрәме узды. Быел бу бәйрәм Габдулла Тукайның 140 еллыгына багышланган иде.
          Бирегә районның төрле мәктәпләреннән 1-9 сыйныф укучылары җыелды. Алар мәгариф бүлеге үткәргән шигырь конкурсының сайлап алу этабын үткән  катнашучылар – җиңүчеләр.

          Бәйрәм сценарийын Зирекле лицее укытучысы Резидә Мавлемзяновна Газыймова әзерләде. Ул бөек шагыйребезнең тормыш юлын эчтәлекле хикәя итеп, балаларның чыгышларын да бердәм бер сюжетка бәйләп, чараны бик матур алып барды.
          Бәйрәмдә районыбызда эшләп килүче «Бөреләр» әдәби иҗат берләшмәсе әгъзалары, шигырь сөючеләр, БТК бүлеге җитәкчесе А. Хәмәтвәлиев, мәгариф бүлеге методисты Фатхутдинова И.Р., Зирекле музее директоры Л. Лотфуллина, «Яңа Чишмә хәбәрләре» газетасы баш мөхәррир урынбасары, шагыйрә Лилия Фәттахова катнашты.
          Мидхәт Газыймов исемендәге музей исә барлык укучыларны да Тукайга багышланган күргәзмә һәм уникаль экспонатлары белән каршы алды.

            Шигырь бәйрәме ГабдуллаТукайның “Туган тел” җыры белән тәмамланды.
          Бөек Тукаебызның шигырьләре безне берләштерә, милләтебездәге матур традицияләрне сакларга ярдәм итә.