2015 нчы елның 16 нчы  маенда  Актаныш авылы «Сәләтле балалар өчен гуманитар гимназия-интернат» дәүләт автономияле гомумбелем учреждениесендә  Татарстан Республикасы Мәгариф һәм фән министрлыгының 2014-2015 нче уку елы планы нигезендә укытучылар өчен Республикакүләм Гамил Афзал укулары уздырылды. Апрель аеннан май аена кадәр дәвам иткән фәнни-эзләнү укуларына 318 эш кабул ителде. Укытучыларның фәнни-эзләнү эшләре филология һәм мәдәниятара багланышлар институты Казан (Идел буе) федераль университеты галимнәре тарафыннан тикшерелде, тиешле таләпләргә җавап биргән 93 эш игътибарга лаек дип табылды. Бәйгедә җиңүче укытучылар 2015 нче елның 16 нчы маенда Республикакүләм Гамил Афзал укуларында чыгыш ясарга чакырылды.

Безнең шәһәрдән 4 укытучы катнашты: 35 нче лицейдан Хуҗанбердиева Чулпан Тимергали кызы, 21 нче мәктәптән Хәсәншина Зәйнәп Зәки кызы, 11 нче мәктәптән Вагыйзов Фәрит Яхъя улы һәм 14 нче лицейдан Мифтахова Эльмира Флүр кызы. Чыгышлардан соң урыннар билгеләнелде  һәм бүләкләү тантанасы үткәрелде. Нәтиҗәләр буенча 35 нче лицейдан Хуҗанбердиева Чулпан Тимергали кызы һәм 11 нче мәктәптән Вагыйзов Фәрит Яхъя улы  II урынга, ә  21 нче мәктәптән Хәсәншина Зәйнәп Зәки кызы һәм 14 нче лицейдан Мифтахова Эльмира Флүр кызы  III урынга лаек булдылар.

Э.Ф.Мифтахова, 14 нче лицейның татар теле һәм әдәбияты укытучысы