Түбән Кама шәһәренең 37 нче номерлы балалар китапханәсендә “Әдәбият елы” кысаларында Бөек Җиңүнең 70 еллыгына багышланган сәнгатьле шигырь сөйләү конкурсы булып узды. Биредә төрле яшьтәге мәктәп укучылары көч сынашты. Чын мәгънәсендә изге хисләр белән сугарылган милләтпәрвәрлекләрен, күзләреннән сирпелеп торган нурга төреп, алар төрле язучыларыбызның иҗат җимешләрен, без – тыңлаучылар тарафына ирештерделәр. Бу шигъри тәлгәшләрдән сугышның ачысын, йөрәкләргә сеңеп калган  әрнү хисен, җаннарны бимазалаган сорауларга җавап ишетергә мөмкин иде.

Мондый зур, күтәренке рухтагы конкурстан без – 14 нче лицей да читтә кала алмадык һәм нәтиҗәләребез дә сөендерерлек булды.

Әхмәтова Рената, 3а сыйныфы – 1 урын (укытучысы Абдушова Р.Р.);

Мөхәммәтгалиев Артур, 3а сыйныфы – 1 урын (укытучысы Идиятова Р.М.);

Батырова Җәмилә, 4э сыйныфы – 1 урын (укытучысы Биктаһирова М.И.);

Нуриәхмәтова Лилия, 7г сыйныфы – 1 урын (укытучысы Фәсхетдинова З.М.).

Татар теле һәм әдәбияты укытучылары арасыннан 1 урынга Идиятова Рәмзия Муллахмәт кызы һәм мин - Абдушова Рузилә Рафаэль кызы  лаек дип табылдык.

Форсаттан файдаланып, барлык ветераннарыбыз һәм гомерләрен аямыйча, яу кырларында ятып калган батыр сугышчыларыбыз рухы алдында башны иеп, ихлас күңелдән рәхмәтемне җиткерәсем килә. Күкләребез аяз, дөньяларыбыз тыныч, күңелләребез саф, күтәренке һәм керсез булсын иде.

Җир йөзендә Ватан өчен кылган гамәл,

Савап булып ирешер ул, онытылмас!

Уз ветеран, урының түрдә синең,

Әй, кадерле яшь буынкай, син торып бас!

Бүләк итеп безгә шушы алсу таңны,

Җиңү килде, рәхмәт Сезгә, ихлас меңләп!

Без яшәрбез янәшәдә, онытмабыз,

Яратырбыз һәм сакларбыз бик кадерләп!

Татар теле һәм әдәбияты укытучысы Р.Р.Абдушова