Кәрим Тинчурин исемендәге татар дәүләт драма һәм комедия театры артистлары  укучылар өчен  Мөхәммәт Мәһдиев әсәре буенча “Без – 41 нче ел балалары” дигән спектакль тәкъдим итте. 14 нче лицейның 5г, 6г сыйныфы укучылары  татар теле һәм әдәбияты укытучысы  Вәлиуллина Ландыш Дамир кызы белән бергәләп яраткан классик язучыбыз әсәре буенча куелган премьера карап кайтты. Спектакль Туфан  Миңнуллин исемендәге татар дәүләт драма театры бинасында булды. Әйтергә кирәк, спектакльдә Мөхәммәт Мәһдиев әсәренең тәэсир көче тагын да арткан. Мәһдиевчә самимилек, үзенчәлекле юмор тамашачыны үзе артыннан ияртеп, бер елатты, бер көлдерде... Ә инде җанлы, тере, онытылмаслык персонажлар – Әлтафи, Әркәшә, Гыйззәтуллин, Зарифуллин, Баязитовлар үзләренә тәмам гашыйк итте. Театрның яшь артистлары сугыш чорында ачлы-туклы халәттә укуның кызык та, кызганыч та якларын бик үтемле итеп җиткерә белде. Яшь артистлар рус теле, география, немец  теле дәресләре күренешләрен күрсәттеләр. Артистлар сүз белән генә тәэсир итеп калмый, бии, җырлый, төрле уен коралларында уйный. Кыскасы, тулы тормышны чагылдыралар алар. Кечкенә генә спектакль тулы канлы булуы, җиңелллелеге белән үзенә җәлеп итте. Рәхмәт аларга.

 Мөхәммәт Мәһдиевнең бу әсәре бигрәк тә актуаль, чөнки монда туган телгә мәхәббәт уятыла. Тәрбияви, тормышчан композиция укучыларыбызга бик ошады.

 Габидуллина Н.И., милли мәгариф буенча директор урынбасары