“Көйле, моңлы татар җыры - 2015” бәйгесе Ел саен мәктәп укучылары арасында оештырылган “Көйле, моңлы татар җыры” дип исемләнгән балалар хоры бәйгесенең төп максаты - туган телгә һәм татар халык җырларына мәхәббәт тәрбияләү. Без әлеге чарага әзерлекне җыр дәресләрендә сентябрь аеннан ук башладык. Музыка җитәкчебез Абдуллов Альберт Әсхәт улы белән берлектә уку елы барышында әзерлекне дәвам иттек.

11 нче мартта 21 нче мәктәптә Түбән Кама муниципаль районы күләмендә укучы балаларның 1-4 сыйныф коллективлары арасында “Көйле, моңлы татар җыры” бәйгесенең III нче төбәкара сайлап алу туры үткәрелде. Анда 14 нче лицей, 2 нче гимназия, 21, 28, 7, 20, 1, 3, 10, 11, 2, 9, 12, 33 һәм 19 нчы мәктәпләрнең җиңүче дип табылган сыйныф коллективлары тыңланды. Бәйгедә 14 нче лицейдан 1-4 нче сыйныф укучылары (2а, 2в, 3г, 3э, 4б, 4г) “Солдатлар” - Р.Әхмәҗанов сүзләре, Ф.Әхмәдиев музыкасы; “Әссәламегаләйкем” –Р.Ахиярова сүзләре, Г.Садә музыкасына язылган җырлар белән катнашты.

IY этап – шәһәркүләм йомгаклау туры (2015 нче елның апрель аенда) И.Х. Садыйков исемендәге Балалар һәм яшьләр иҗаты сараенда уздырыла. Бәйгедә һәр төбәкнең 1-4 нче, 5-6 нчы, 7-8 нче сыйныфлары арасында җиңүче дип табылган сыйныф коллективлары катнашачак.

Музыка җитәкчебез Абдуллов Альберт Әсхәт улына, сыйныф җитәкчеләренә, бәйгедә катнашкан барлык балаларга, ата-аналарга рәхмәтебезне белдерәбез. Шәһәребездә мондый чаралар булганда, милли традицияләребез, буыннан-буынга күчеп килүче җыр-моңнарыбыз, һичшиксез, киләчәк буынга җиткерелер... Сынатмассыз, җиңүләргә ирешерсез дигән өметтә ышанып калабыз! Рәхмәт Сезгә!..

14 нче лицейның милли мәгариф буенча директор урынбасары Н.И.Габидуллина