Сокланырсың сылу кызга,
Чыңлый чулпы төймәсе.

Э. Шәрифуллина

Татар кызы... Нечкә билле, сылу гәүдәле, кыйгач кашлы, кара күзле, озын толымлы татар хатын-кызлары... Кем генә сокланмый аларга! Матур булуларына карамастан, үтә тыйнак, җыйнак, сабыр, түземле, кунакчыл, сынмас рухлы, батыр йөрәкле дә әле алар. Хатын-кыз – нәселне, милләтне, Халкыбызның олылыгын, бөеклеген саклап калырга бурычлы зат.

Татар халкым гомер буе нәфис, уңган татар кызлары белән дан тоткан.   Гасырлар буе нинди генә сынауларга дучар булса да, барлык авырлыкларны җиңеп, үз телен, үз милләтен, үз гореф-гадәтләрен саклап килгән халык.

Менә шушы гореф-гадәтләрне үз эченә алган “Чибәркәй–2014” конкурсының йомгаклау туры 24 нче мартта 15.00 сәгатьтә Түбән Кама шәһәренең И.Х.Садыйков исемендәге Балалар һәм яшьләр иҗаты сараенда үткәрелде. “Чибәркәй-2014” бәйгесендә шәһәребезнең 44  сылу, уңган-булган, гүзәл кызлары катнашты. Ә аның финалына сайлап алынган 15 кыз шәһәребезнең иң чибәр татар кызы исеме өчен ярышты.

Конкурсның барлык сынаулары тәмамлангач, жюри төрле номинацияләрдә җиңүчеләрне һәм “Чибәркәй” исеменә лаек булган кызны билгеләде. Бу исемне “Нижнекамскнефтехим” акционерлык җәмгыятенең химик анализ лаборанты Айгөл Хәбибуллина алды. Айгөлгә һәм аерым номинацияләрдә җиңүчеләргә – акчалата бүләкләр, конкурс финалында катнашкан кызларның барысына да Дипломнар тапшырылды.

Бу конкурста безнең лицей укучылары 9г сыйныфы укучысы Хәйретдинова Эльвина (Насыйрова М.С., Вәлиуллина Л.Д. җитәкчелегендә), 10л сыйныфы укучысы Садыйкова Ләйсән (Әбүярова С.М., Мифтахова Э.Ф. җитәкчелегендә) актив катнашып финалга чыктылар һәм уңышлы чыгыш ясап,  катнашучы Дипломына лаек булдылар.

Казаннан килгән эстрада артистлары Салават Миңнеханов һәм Гүзәлем тарафыннан котлаулар яшь кызларыбызның күңелендә озак сакланыр һәм тагын да биек үрләрне яуларга рухландырыр дип ышанасы килә.