15 февраль  көне 6 нчы Г сыйныфы укучылары Балалар китапханәсенең 37 нче филиалында кунакта булдылар. Китапханәче Валиева Әнүзә Әбүзәр кызы алар өчен “Батырлык дәресе” үткәрде. Ул укучыларга  Советлар Союзы Герое , Ленин премиясе лауреаты шагыйрь  Муса Җәлил турында сөйләде. Шагыйрьнең батырлыгы турында  балалар тын да алмыйча тыңладылар, аның үлемсез  шигырьләре  аларның күңелендә тирән эз калдырды.

Туфрак күмәр тәнне, күмә алмас

Ялкынлы җыр тулы күңелне,

“Үлем” диеп әйтеп буламы соң

Җиңеп үлгән мондый үлемне?

   Палач балтасы астында да шундый зирәк, ялкынлы, Туган илне чиксез ярату һәм кеше каны эчүчеләргә -фашистларга  үтергеч нәфрәт белән сугарылган шигырьләр язу өчен тимердәй нык ихтыярлы, аек акыллы, олы җанлы, кайнар йөрәкле кеше булырга кирәк.  М. Җәлил халкыбызның данын еракларга яңгыратты.

Башым иям бу дәһшәтле чорда

Шундый уллар биргән халыкка.

Башым иям бу халыкның исемен

Мәңге үлмәс иткән шагыйрьгә. (П. Хузангай)

   Дәрес ахырында уздырылган викторина Муса Җәлилнең батырлыгы укучыларны битараф калдырмаганлыгын күрсәтте. Алар бөтен сорауларга да бик актив һәм дөрес итеп җавап бирделәр. Муса Җәлилнең шигырьләр җыентыгын, Х. Җәлилованың “Абыем турында” дигән хикәяләрен Һ.б.ны өйләренә дә укырга алып киттеләр.

   Татар халкының талантлы улы, бөек солдат, бөек шагыйрь  - Муса Җәлил алдында баш иябез. Аның батырлыгы яшь буынны яктылыкка, хөрлеккә өндәп торыр.

Татар теле һәм әдәбияты укытучысы – Фәсхетдинова Зилә Мөгаллим кызы