Габдулла Кариев исемендәге Казан татар дәүләт яшь тамашачы театры кабат бездә - Түбән Камада! Алар безгә бу юлы Рафис Корбанның  “Бүре һәм Кәҗә” музыкаль  әкиятен алып килгәннәр дигән хәбәрне ишетү белән, без, бертавыштан, театрга барырга теләк белдердек.  Һәм, ниһаять, без: башлангыч сыйныф укытучысы Хәкимова Венера Гәпделхәй кызы, татар теле һәм әдәбияты укытучысы Идиятова Рәмзия Муллахмәт кызы, язның иң матур көннәренең берсендә, 15 нче март көнне, яраткан укучыларыбыз 3г һәм 4г татар сыйныфы укучылары белән, җаннарга шифа алыйк дип,  Туфан ага Миңнуллин исемендәге Түбән Кама  татар дәүләт драма театрына юнәлдек.

Менә без театрда. Бу юлы урыннарыбыз да иң алгы рәттә икән. Кызыксынып сәхнәне күзәтәбез. Бу килүләрендә безне ни белән шатландырырлар икән дигән уй белән күзләребез сәхнәгә төбәлде.  Әкиятләргә генә хас булганча,  биредәге  могҗизалы халәт безне үз эченә алып кереп китте...Шулчак, үзем дә сизмәстән, тирә-юньгә карап, сабыйларны күзәтәм: йөзләрендә нур, күзләрендә шатлык һәм кызыксыну хисләре чагыла... Балачакта шулай инде диярсез. Әмма, ни могҗиза, үземнең күзләрем дә моң белән тулган икән бит... Ә боларның барсы да сәхнә артистларының тырышлыгы нәтиҗәсе. Алар шундый үзенчәлекле киемнәре, сандугачтай матур тавышлары белән йөрәкләребезне яулый  алдылар, димәк, музыкаль әкият бик уңышлы үтте.

 Габдулла Кариев исемендәге Казан татар дәүләт яшь тамашачы театры артистларына киләчәктә  дә зур иҗади уңышлар теләп, 14 нче лицей укучылары һәм укытучылары исеменнән ихлас күңелдән рәхмәтебезне җиткерәбез.

Башлангыч сыйныф укытучысы  В.Г. Хәкимова