Татар моңы иңгән күңелләргә,

Йөрәкләргә сарган җылысын.

Тарихларның энҗе бөртеге ул

Ә бүләкнең иң-иң олысы...    

И сөекле,  таш бәгырьләрне эреткән, күңелнең иң нечкә кылларын тибрәтергә сәләтле, мөкатдәс татар моңы, синең алда баш иябез! Җиһан сулышында инде тутыгырга өлгергән күңелләребезгә сихәт өстәр өчен, сиңа ашкынабыз. Менә без дә: башлангыч сыйныф укытучысы Хәкимова Венера Гәпделхәй кызы, татар теле һәм әдәбияты укытучысы Абдушова Рузилә Рафаэль кызы, көзнең иң матур көннәренең берсендә, 19 октябрь көнне, яраткан укучыларыбыз  4-г татар сыйныфы укучылары белән җаннарга шифа алыйк дип, Түбән Кама драма театрына юнәлдек.

 Нинди шатлыклы, сөенечле көн иде ул! Ерак тарихтан, буыннан-буынга сакланып килгән халкыбыз моңын ишетергә теләү күңелләрне үсендерә, серле әкият иленә чакыра. Кунакларыбыз да -  Габдулла Кариев исемендәге Казан татар дәүләт яшь тамашачы артистлары – үзләренең  “Җиде кыз” музыкаль-әкияте белән, без, тамашачыларны, сихри патшалыкка чорнады. ...Зал шыгрым тулы... Тамашачылар дә бер тын белән сулыйлар. Артистларның үз-үзен тотышы, киемнәре, сәхнә бизәлеше югары бәягә лаек.

Бу көн, чын мәгънәсендә,  рухи бәйрәм иде. Әкият барышына сәхнәдән татар моңы өзелмәде...челтерәп аккан чишмәдәй җанны иркәләде.

“Җиде кыз” музыкаль-әкиятеннән барыбыз да канәгать калдык.

 Яшь артистларыбызга шундый якты бәйрәм бүләк иткәннәре өчен, ихлас күңелдән рәхмәтебезне җиткерәбез. Залларыгыз тулы булып, гел кешеләрне сөендереп, яшәргә насыйп булсын!