Курайчылар курай уйнамас,      

Башкорт курайлары булмаса...  

24 нче апрельдә   И.Х. Садыйков исемендәге Балалар һәм яшьләр иҗаты сараенда Түбән Кама муниципаль районы  күләмендә укучы балалар арасында “Яшь курайчылар” фестиваль-бәйгесенең  ХV нче шәһәркүләм йомгаклау туры үткәрелде.

Бу бәйгедә 14 нче лицейның  3Г һәм 4В сыйныфы укучылары  катнашты. Һәр сыйныфта 10-12 укучыдан ансамбль оештырылды, аларга матур-матур исемнәр сайланды, мәсәлән: 3Г – “Таң җилләре”, 4В – “Чулман энҗеләре” исемен үз итте. Бәйгенең тагын бер шарты – укучыларның сәхнә костюмыннан булулары иде, анысын инде башлангыч сыйныф укытучылары Шмелева Л.Г., Хәкимова В.Г. кайгыртты.  3Г сыйныфының репертуарында  “Өммегөлсем”, “Өч дус биюе”, “Ак бүре”, ә 4В сыйныфы репертуарында “Зәйнәбем”, “Рәйхан”, “Сандугач-күгәрчен” көйләре аһәңле яңгырады, курай моңнары бөтен залга таралды. Җитәкчеләре Әмируллин Дилшат Минсәях улының тырышлыгы аркасында  3Г сыйныфы укучылары (2 нче сыйныфлар арасында), 4В сыйныфы укучылары (3-7 сыйныфлар арасында)  III нче дәрәҗә лауреат Дипломы  белән бүләкләнделәр.

Конкурсның Татарстан Республикасында экология елына багышлап үткәрелүе  турында да әйтеп үтәргә кирәк. Быелгы фестиваль-бәйге укучыларыбыз хәтерендә озак сакланыр дип ышанасы килә.

 Кадерле укучыларыбыз һәм аларга ныклы белем, тәрбия бирүче Шмелева Л.Г., Хәкимова В.Г.; ел саен “Яшь курайчылар” бәйгесендә  укучыларыбызны призлы урыннар белән сөендерүче, таләпчән, барлык көчен куеп эшләүче өстәмә белем бирү педагогы – Әмируллин Дилшат Минсәях улына сәламәтлек, гаилә бәхете, яңадан-яңа уңышлар теләп калабыз.

Габидуллина Н.И., милли мәгариф буенча директор урынбасары