Булсак та төрле милләттән,

 Без яшибез уртак теләктә.

Сөйләшәбез төрле телләрдә,

Аңлашабыз дуслык телендә.

Үстергән дә безне чын дуслык,

Көч биргән дә безгә чын дуслык.

Дуслык булса, яшәр гомергә

Бөтен җир шарында тынычлык.

14 нче лицейда 11 февральдән  21 нче февральгә кадәр Туган телләр ункөнлеге үткәрелде. Декадага әзерлек алдан ук алып барылды, аны үткәрүдә укытучыларыбыз актив катнашты һәм алар тарафыннан 2  зур ачык  чара күрсәтелде. Быелгы декаданың  темалары үзенчәлекле һәм мавыктыргыч булды.

Балаларда туган ягыбызга, телебезгә, гореф-гадәтләребезгә, җыр-моңга һәм, гомумән, мәдәниятебезгә карата  мәхәббәт хисләрен тәрбияләүне күздә тотып, Насыйрова М.С., Насыйрова Ф.М.  14 нче февральдә “Моң – халыкларны берләштерә” дигән класстан тыш чара күрсәттеләр.

Алып баручылар ролен Әскәрова Резидә (10а) һәм Фәссахов Динар (11л) бик оста башкардылар. Сәхнәдә бер-берсен талантлы  укучыларыбыз алмаштырып торды: Лотфуллина Айгөл (11ю), Лотфуллина Лиана һәм Гончарова Анастасия (7б), Әбләкимова Алинә (8в), Кашипов Руслан (6г), Шәяхмәтова Диана (9э). Милли киемнәр укучыларыбызга бик тә килешле иде

21 нче февральдә “Халыклар дуслыгы фестивале” үткәрелде. Бу юлы  кичә җыр-бию белән үрелеп барды. Актлар залы укучылар, укытучылар, әти-әниләр белән шыгрым тулы иде, алма төшәрлек тә урын калмаган... Һәркемнең күзе сәхнәдә...

Ә анда чын могҗиза, нинди генә биюләр юк!  Киемнәре күз явын алырлык...Менә  укучыларыбыз бер-бер артлы татар (7в, 9м), рус (6в, 9э). куба (5а), грузин (6э), француз  (6б), египет (8л) халыкларның биюләрен башкаралар.

 Йомгаклап шуны әйтәсе килә: без күпмилләтле Татарстан җирендә яшибез, башка халыкларның гореф-гадәтләре, җыр-биюләре безгә ят түгел, укучыларыбыз аларны рәхәтләнеп өйрәнә һәм матур итеп башкара. Кичәдә без мәктәбебезнең талантлары – җыр-моңга, биюгә гашыйк укучыларына сокланып утырдык. Бу “Дуслык бәйрәме” барыбызның да күңелендә озак сакланыр.

Н.И.Габидуллина, 14 нче лицейның милли мәгариф буенча директор урынбасары