Укытучы булып калыйк һәрчак:

Мәктәптә дә, читтә, өйдә дә.

Укытучыга мактау яңгырасын

Шигырьдә дә, матур көйдә дә.

Тырыш булыйк, безнең исемнәрне

Һәрвакытта якын итсеннәр.

Бездән киткән укучылар яннан

Бүрекләрен салып үтсеннәр.

Язмышыбыз авыр, күпләр аңлый,

Ләкин һәркем үзе сайлаган.

Юл башында авырлыгын үлчәп,

Башка язмыш сайлап алмаган.

Укытучы булып кала белик,

Бу роль мәңгелеккә бирелгән.

Аерылмыйк, еллар үтсәләр дә,

Кыңгыраулы мәктәп иленнән.

Хөрмәтле педагоглар һәм ветеран укытучылар! Һөнәри бәйрәмегез – Укытучылар көне уңаеннан кайнар котлауларыбызны кабул итегез! Сезнең хезмәтегез һәрвакыт илебез киләчәгенең төп нигезе булды һәм шулай булып калачак та. Ә укытучы дигән олы исем барлык телләрдә дә зур ихтирам һәм чиксез хөрмәт белән яңгырый. Һөнәри бәйрәмегез уңаеннан, үз хезмәтегезгә тугрылыклы булганыгыз, зирәклегегез, һәр балага күңелегездә урын таба алуыгыз, үзегез тәрбияләүче балаларны әйләнә-тирәнең матурлыгын тоярга өйрәтүегез өчен сезгә зур рәхмәт. Сезгә авыр һәм игелекле хезмәтегездә иҗади уңышлар, гаиләләрегезгә иминлек, ныклы сәламәтлек, гаилә бәхете телибез.

Н.И. Габидуллина, милли эшләр буенча директор урынбасары