Күптән түгел безнең балалар бакчасы тарафыннан оештырылган регион күләмендә балалар бакчалары арасында бөек шагыйребез Габдулла Тукайның туган көненә багышланган «Тукай яши безнең күңелләрдә-2026»  исеме астында шигырь укучылар бәйгесе уздырылды. Бәйгедә барысы 115 балалар бакчасы катнашты. Бүген бакчабызда шушы бәйгенең финалы узды. Анда  1 урынга лаек булган 19 балалар бакчасы җиңүчеләре катнашты. Бәйрәм 49 нчы балалар бакчасында тәрбияләнүче балалар һәм зурлар башкаруында «Гөрләшеп яшик» җыры белән башланып китте.  Бәйрәмгә кунак булып шагыйрә Әлфия Мирзанур кызы Ситдыйкова, шагыйрь, прозаик Факил Миннемөхәммәт улы Сафин,  Яр Чаллы шәһәре Мәгариф идарәсе башлыгының 1 урынбасары Раил Фәнил улы Миннегареев, Яр Чаллы шәһәре Мәгариф идарәсенең баш белгече Алия Фәрит кызы Мөхәммәтова килгән иде. Җиңүче балалар үзләре өйрәнгән шигырьләрне тагын бер кат килгән кунакларга сөйләп күрсәттеләр. Тукай әсәрләренең безгә таныш геройлары Кәҗә белән Сарык,  Су анасы белән Шүрәле балаларны әкият иленә алып китеп, уйнатып, балаларның күңелен ачып, ял иттерделәр. Бәйрәм бик күңелле рухта узды. Бәйрәмне бергәләшеп татар халкының гимнына әйләнгән «Туган тел» җыры белән тәмамладык. Хөрмәтле кунакларыбыз үзләренең рәхмәт сүзләрен әйттеләр. Бәйрәмнән барысы да күтәренке рух белән кайтып киттеләр.