"Туган телләр һәм халыклар бердәмлеге елы" ның азагына да якынлашып киләбез, ләкин без, галиакышлылар,  аның белән хушлашмыйбыз әле. Безнең авыллар тарихын , анда тыйнак кына яшәп ятучы шәхесләрнең тормыш һәм хезмәт юлын өйрәнүгә юнәлдерелгән "Авыл он -лайн" проекты үз эшчәнлеген дәвам итәчәк. Бу атнада 10а сыйныфы укучылары үзләре сайлаган Тукай районы Иштирәк авылында булып кайттык. Авыл безне бик җылы каршы алды. Беренче итеп, шушы авылда туып-үскән , хэзерге вакытта Түбән Кама шәһәрендә табиб булып эшләүче Самат улы Вагыйз Сайфуллинның музеена юл алдык  Авыл тарихын гына түгел, ил тарихын чагылдыручы экспонатлар, ил үсешенең төрле этапларын яктырткан машина, мотоцикл маркалары, Ленин, Сталин тавышларын яздырган пластинкалар- ниләр генә юк монда!  Музей оештырып кына калмыйча, авылдашлары  хатирәләрен, архив материалларын  җыеп  китап итеп бастырырга да вакыт тапкан Вагыйз Саматович!  Бу  кешеләрнең үз туган җиренә, иленә  булган хөрмәт , мәхәббәт хисләренең тирәнлеген дәлилли түгелме?!  Рәхмәт һәм соклану хисләренә уралып юлыбызны авыл мәктәбенә юнәлттек. Шаккатмалы ике этажлы, яңа гына ремонт эшләре белән яңартылган, барлык шартлар тутырылган бина елмаеп каршылады. Шәһәрләр көнләшерлек. Укытучыларга һәм  укучыларга рәхәтләнеп эшләргә , укырга гына кала. Уңышлар телибез Иштирәклеләргә!