Элекке заманнарда безнең бабаларыбыз, бабаларыбызның бабалары Яңа ел бәйрәмен 22 мартта уздырганнар. Аны “Нәүрүз” дип атаганнар. Бу сүзнең мәгънәсе фарсыча “яңа көн” дигәнне аңлата. Нәүрүз көн белән төн тигезләшкән чорга – 21–22 мартка туры килә. Көнчыгыш календаре буенча язны каршылау язгы чәчү эшләре алдыннан үткәрелә торган халык бәйрәменнән гыйбарәт.

Татар халкының тагын бер күңелле язгы бәйрәме – “Карга боткасы”. Элек-электән кешеләр җирдә язның нилектән булганын белмәгәннәр, аны җылы яктан каргалар алып килә дип уйлап, гөрләвекләр ага башлагач, каргалар килгәч, алар хөрмәтенә “Карга боткасы” дигән бәйрәм ясаганнар. Әби-бабаларыбыз бала вакытта матур итеп киенеп, өйдән өйгә кереп, ярмалар, йомыркалар җыеп, изге теләкләр теләп, авыл халкын бәйрәмгә чакырганнар. Су буйларында, аланнарда казан асып, ботка пешкәнче уйнап-җырлап, такмак әйтешкәннән соң, бергәләп ботка ашаганнар, калганын каргаларга дип җир өстенә сипкәннәр.

82-нче кадет мәктәбендә дә әлеге бәйрәмнәрне үткәрү матур гадәткә әйләнде. Без, укытучылар һәм укучылар, ел саен язгы каникулның беренче көннәрендә мәктәбебездә җыелып, төрле спорт ярышлары үткәрәбез, кызыклы уеннар уйныйбыз, тапкырлыкта һәм җитезлектә көч сынашабыз.

Быел да әлеге бәйрәм бик матур һәм кызыклы узды. Уеннарда укучылар да, укытучылар да бик теләп катнаштылар, сорауларга һәм табышмакларга да бик оста җавап бирделәр.

Ә бәйгеләрдән соң казанда пешкән тәмле ботканы барыбыз да бик яратып ашадык һәм язны алып килүче кошларыбызга да өлеш чыгардык.