Укучыларга үткән тарихыбызны дөрес итеп җиткерү, телебез, динебез, гореф-гадәтләребез, милли йолаларыбыз, бөек шәхесләребез турындагы белемнәрен ныгыту, милләт язмышына битараф  булмаган  шәхесләр тәрбияләүдә ярдәм итү максатыннан, 14 нче Балалар һәм яшүсмерләр үзәге, шәһәр мәгариф һәм яшьләр белән эшләү идарәсе белән берлектә инде 19 ел рәттән «Татарстан дигән Ватаным бар, татар дигән бөек халкым бар» дип исемләнгән бәйге үткәрә.

Агымдагы елда бәйгедә шәһәребезнең 36 мәктәбеннән өлкән сыйныф укучылары катнашты. Бәйге барышында конкурсантларыбыз татар халкының тарихы, дине, сәнгате, әдәбияты турында белемнәрен исбатладылар.

Ике тур нәтиҗәсендә  иң күп балл җыйган 7 укучы финал ярышларына үтте:

2 гимназия - Вахитова Илүзә;

4 нче мәктәп - Батршина Алия;

19 нчы мәктәп –Әмирова Алсу;

25 нче мәктәп - Гарифҗанова Миләүшә;

34 нче мәктәп - Билалова Әдилә;

60 нчы мәктәп - Муллагалиева Алия;

78 нче лицей - Шәрипова Энҗе.

Бүген, 17 апрель көнне 14 нче Балалар һәм яшүсмерләр үзәгендә бәйгенең финал ярышлары булып узды. Финалистларны «Туган телдә дәшсәм генә,туган җирем мине аңлар» дигән тема астында үзләре белән таныштыру, интеллектуаль бирем Һәм милли рухта сугарылган иҗади бирем сынаулары көтә иде.

Балаларның белемнәрен бәяләүдә алыштыргысыз жюри әгъзаләре Яр Чаллы Дәүләт педагогия университетының татар теле, әдәбияты һәм аны укыту методикасы кафедрасы, тарих һәм аны укыту методикасы кафедрасы мөгаллимнәре, шәһәребезнең «Нур-Ихлас» мәчете вәкилләре, «Күңел» радиосы алып баручылары зур өлеш кертәләр.

Биш ел рәттән «Татарстан дигән Ватаным бар, татар дигән бөек халкым бар» бәйгесенең иганәчесе булып «Чаллы икмәге» акционерлык оешмасы тора. Бүген дә финалистларыбызны «Чаллы икмәге» оешмасы тәкъдим иткән баллы күчтәнәчләр көтә. 14 нче Балалар һәм яшүсмерләр үзәге администрациясе һәм бәйгене оештыручылар финалистларыбызны бүләкләүдә ярдәм күрсәткән «Чаллы икмәге» ябык акционерлык оешмасы генераль директоры урынбасары Эдуард Рафаэл улы Юносовка олы рәхмәтләрен җиткерә.

Ә бәйгебез нәтиҗәләренә килгәндә, ул түбәндәгечә:

1 урын - Шарипова Энҗе (78 нче лицей)

2 урын - Батршина Алия (4 нче мәктәп)

3 урын - Гарифҗанова Миләүшә (25 нче мәктәп)

Без татарлар! Үз илебез, телебез белән горурланыйк! Тарихыбызны, мәдәниятебезне, сәнгатебезне онытмыйк, өйрәник, яратыйк! Илебезнең киләчәге безнең кулда!