Татарстан Республикасы Мәгариф һәм фән министрлыгы 2013 нче елның 11 нче апрелендә Актаныш муниципаль районы “Сәләтле балалар өчен гуманитар гимназия-интернат” дәүләт автономияле гомумбелем учреждениесе белән берлектә укытучылар өчен “Туган телем – шагыйрьләр теле” исемле фәнни-эзләнү конференциясе үткәрде.

Февраль аеннан марта аена кадәр дәвам ителгән фәнни-эзләнү укуларында 329 эш кабул ителде. Укытучыларның фәнни-эзләнү эшләре филология һәм сәнгать институты Казан (Идел буе) федераль университеты галимнәре тарафыннан тикшерелде һәм 117 эш игътибарга лаек дип табылды.

Әлеге конференция кысаларында республика татар теле һәм әдәбияты укытучылары арасында мастер-класслар күрсәтү дә каралган иде. Мөслим гимназиясенең татар теле һәм әдәбияты укытучысы Эльмира Тимергалиева,  “Хәзерге чор балалар шагыйрьләре иҗатына хас фәлсәфә, фольклоризм” (Мөҗәһит Әхмәтҗанов табышмакларының хәзерге чор балалар әдәбиятында урыны) дигән темага мастер-класс күрсәтеп, I урын алды.

Чарага кунак итеп, шагыйрь, Дәүләт Советы депутаты Роберт Мөгаллим улы Миңнуллин да чакырылган иде. Эльмира Василовнага  бүләк итеп, ул узенең 7 томлык җыентыгын тапшырды.