25 сентябрьдә Яр Чаллының «Органный зал» мәдәният үзәгендә Машина төзүчеләр көненә багышланган тантаналы чара узды. Анда Татарстан Республикасы Рәисе Рөстәм Миңнеханов һәм Россия Федерациясенең сәнәгать һәм сәүдә министры урынбасары Алексей Владимирович Матушанский катнашты.

Чара барышында тармак хезмәткәрләренә фидакарь хезмәтләре, республика һәм ил үсешенә керткән өлешләре өчен рәхмәт белдерелде. Техник иҗат юнәлешендә югары нәтиҗәләргә ирешкән 5 педагогны Яшел Үзәннең «ПОЗИС» заводы генераль директоры, Татарстан төбәк бүлекчәсенең Россия машина төзүчеләр берлеге рәисе Радик Шәүкәт улы Хасанов бүләкләде. Җиңүчеләргә бүләк итеп Татарстанда җитештерелгән ноутбуклар тапшырылды.

Бүләкләнүчеләр арасында Казан, Яр Чаллы, Түбән Кама шәһәрләреннән, Мөслим һәм Яшел Үзән районнарыннан вәкилләр бар иде. Шуларның берсе — безнең районнан өстәмә белем бирү педагогы Лилия Бадртдинова. Аның «Техник түгәрәкләр җитәкчеләре» номинациясендә бүләкләнүе районыбыз өчен зур горурлык.