"Остазлык мәктәбе" - Республиканың мәгариф һәм фән системасы өчен кадрлар әзерләү проекты старт алды.
Агымдагы уку елында 10 атна дәвамында,  Казан (Идел буе) федераль университетының укытучы белгечлеге буенча югары белем алучы 1 нче курс  студентлары, инновацион махсус программа нигезендә күпкырлы белем  һәм күнекмәләр алачак. Әлеге программа Ш.Мәрҗани исемендәге 2 нче татар гимназиясе мөгаллимнәре һәм КФУның филология һәм мәдәниятара багланышлар институты коллективы тарафыннан төзелде. 

Студентлар, проект кысаларында, туган телдә укыту һәм тәрбия бирү өлкәсендәге бай һәм нәтиҗәле тәҗрибәне үзләштерәчәк, укытучы һөнәренең барлык нечкәлекләренә төшенәчәк. Гимназиянең талантлы яшь белгечләре һәм тәҗрибәле укытучылары, шәкертләр өчен, ачык дәресләр бирәчәк. Булачак мөгаллимнәр, заман укытучысы каршына очрый торган төрле вазгыять үзенчәлекләрен "Остазлык мәктәбе" нигезендә ачыклаячак. Әлеге проект сыйныф сәгатьләре уздыру, дәресләрдән тыш чаралар белән таныштыру, имтихан, олимпиадаларга әзерләү эшчәнлеген һәм мәгариф системасындагы тенденцияләрне практик күзлектән өйрәнүне дә үз эченә ала. 

Мәгариф һәм фән министрылыгы, КФУ һәм гимназия вәкилләре каршында, булачак остазлар тарафыннан, проект яклау - йомгаклау эше тәкъдим ителәчәк. Ул үрнәк дәрес бирү һәм мастер-класс белән чыгыш ясаудан гыйбарәт. 
Проект эшчәнлеге - студентлар өчен уку программасының бер өлеше булып тора һәм 1 нче курстан башлап, соңгы курска кадәр, ягъни, университетта уку дәверендә уздырылуга корылган. 

"Остазлык мәктәбе" проекты - Республика күләмендә беренче тапкыр тормышка ашырыла. Әлеге эшчәнлек гимназиянең заманча җиһазландырылган, техник мөмкинлекләр белән баетылган  яңа бинасында оештырылачак. Проект Республика күләмендәге башка мәктәп базаларында да булдырылып, "Остазлык мәктәбе"нең чикләре киңәер дигән өметтә калабыз.