22 - 27 нче апрельләрдә мәктәптә татар теле һәм әдәбияты атналыгы үткәрелде. Укучылар белән берлектә “Чәчәкләр китерегез Тукайга!” дигән исем астында стена газетасы чыгарылды.  1-5 нче сыйныф укучылары арасында Тукай иҗатына багышланган рәсем конкурсы уздырылды. “Язлар безгә Тукай белән килә” дип аталган әдәби викторина һәм конкурсларда мәктәпнең 5-9 нчы сыйныф укучылары актив катнашты. Тукай иҗатына багышланган кул эшләре һәм  китаплар күргәзмәсе дә оештырылды. Йомгаклау чарасы итеп, 26 нчы апрель  көнне, ата-аналар һәм укытучылар өчен “Тукай безнең күңелләрдә” дип аталган бәйрәм чарасы үткәрелде. Бәйрәмне 11 нче сыйныф укучылары О.Ощепкова һәм А.Мардамшин татар һәм рус телләрендә алып бардылар. Бәйрәм чарасында 1-11 нче сыйныф укучылары Тукайның шигырьләрен яттан сөйләделәр һәм сәхнәләштерделәр. Бигрәк тә 6 нчы сыйныф укучысы И.Сабиров башкарган “Пар ат” җыры ата-аналар күңеленә хуш килде.  1-4 нче сыйныф укучыларының татар телендә сөйләгән әсәрләрен яратып тыңладылар. Бәйрәм  татар халкы өчен гимнга әйләнгән “Туган тел” җыры белән башланып китте һәм барлык укучылар башкаруындагы   “Туган  тел” җыры белән тәмамланды.