Кичә гимназия укучылары борынгы Болгар каласына сәяхәт кылды. 6, 7 нче сыйныф укучылары бу сәяхәткә күптән үк ният итеп куйганнар иде. Матур җәйгә чыгуга, бу мөмкинлек үзеннән-үзе килеп чыкты. Иртә таңнан зур-зур автобусларга утырып, бер төркем балалар - Казанга, икенче автобуста - изге Болгарга сәяхәткә кузгалды. Сәяхәт бик файдалы һәм эчтәлекле булды. Болгарда көннән-көн үзгәрешләр бара. “Ак мәчет”кә күз салсаң да, аһ итәрлек, утыртылган алмагачлар – шау чәчәктә. Һәр почмакта эш кайный. Хәзерге вакытта елга порты янындагы ярны ныгыту эшләре бара. Бер көн эчендә генә тарихи корылмаларны, музейларны карап бетереп тә булмый, иркен­ләп танышу өчен берничә көнгә барырга кирәк. Хәтта бер тапкыр инде биредә булган укытучылар да, чиста саф һавада тарихи истәлекләрне карап, “Шәп бит бу! Тарих белән танышыр, күңел белән ял итәр өчен менә дигән урын! Карагыз әле, нинди искиткеч хозурлык!” – дип сокланып йөрделәр.