Гимназиядә бүген эш көне күңелле шау-шулар белән башланды. "Ачык ишекләр көне"нә балалар әти-әниләрен ияртеп килгәннәр иде. Кыска-кыска ике дәрестән соң барча халык залга агылды. Анда 8 нче класс укучылары инде бар мәктәп яратып өлгергән "Шүрли белән Былтырҗан" спектаклен күрсәтте. 3 телдә барган концерт номерлары гимназиянең полилингваль юнәлештәге эшчәнлеген күрсәтсә, ачык дәресләр сингапур структуралары кулланып үткәрелде. Өстенлекле мәктәп проектын үзләштерә башлаганнан бирле, мондый ачык дәресләр гел булып тора гимназиядә. Әти-әниләрнең яңа төр укыту белән кызыксынулары көчле, шуңа да түзеп тора алмадылар, балалары белән бер парта артына утырып, РЭЛЛИ РОБИН, ТАЙМ ПЭ ШЭАларны уйнап карадылар. Әйе, совет чоры мәктәбен үткән өлкәннәр өчен уен кебегрәк тоела бу структуралар, ә чынлыкта дәрестә һәр бала алган белемне үзе аша үткәрсен, көченә-көчсезлегенә карамастан, язсын, сөйләсен, төркем эчендә хезмәттәшлек итәргә өйрәнсен өчен тәкъдим ителгән структуралар бу. КЛОК БАДДИС, ДЖОТ ТОТС, ТОКИН МЭТ структуралары эченә баланы критик фикерләүгә өйрәтү алгоритмы да салынган. Менә шулар һәм башка нәрсәләр турында сөйләшүне залда гимназия директоры Ренат Мәхмүт улы оештырды. Гимназиядә нәшер ителә торган мәктәп газетасын тапшырганнан соң, ата-аналар канәгать булып таралыштылар.Укытучылар исә, тәҗрибә уртаклашу өчен, районның мәктәп директорлары һәм урынбасарлары килүгә әзерлек эшләрен башлап җибәрде.