Кичә 9 нчы сыйныф укучылары Низамова А., Акберова Л., Хәбирова А. Казанда «Пирамида» мәдәни-күңел ачу комплексында булып узган "Сәләт" хәрәкәтенең 20 еллык юбилеена багышланган бәйрәм концертында булып кайттылар. Укучылар сөйләвенчә, чарада ТР Президенты Рөстәм Миңнеханов, шулай ук федераль хакимият һәм чит илләрдәге татар диаспоралары вәкилләре катнашкан. "Сәләт" проекты җитәкчесе Җәүдәт Сөләйманов чыгышында “Сәләт” хәрәкәтенең ТР Яшьләр эшләре һәм спорт министрлыгы, ТР Мәгариф һәм фән министрлыгы һәм ТР Фәннәр академиясе ярдәме белән үсеш алуын, хәзер   50 дән артык уку-фәнни, фестиваль-иҗади һәм социаль юнәлештәге проектларның гамәлгә куелуын, аларда 12 меңнән артык талантлы укучылар һәм студентлар катнашуын сөйләгән. Концертта кызлар КВН командаларын, Казанның танылган битбоксеры Митя Бурмистров һәм "La Primavera" оркестрын күреп, “Сәләт” тарихы турында берничә фильм да карап кайтканнар. ТР Президенты Рөстәм Миңнеханов үз чыгышында "Сәләт"нең республика үсешенә керткән өлешен, телне, милли традицияләрне һәм гореф-гадәтләрне саклау буенча эшләре зур булуын билгеләп үткән.

"Сәләт"тә безнең гимназия укучылары да чыныгу алды, Гайниева Айназ, Шаймарданова Гөлшат, Валиева Ләйсән, Ильин Альберт кебекләр үзләре әйдаман булуга ирештеләр. Кыскасы, сәләтлеләрнең сәләтен ачуда роле бик зур "Сәләт"нең.