Өстенлекле Мәктәпләр зур җанлану белән үзара тәҗрибә уртаклашырга кереште. Гимназия укытучылары Алабуганың 4 нче санындагы гимназиясендә регионкүләм семинарда булып кайтты. 9 районнан Өстенлекле Мәктәпләрнең вәкилләрен туплаган бу семинар Татарстан республикасы Мәгариф һәм фән министрлыгы тарафыннан оештырылган иде. Гимназиянең директоры Хәмитов Р.Р., килгән кунакларны сингапур структураларын куллануны тагын да активлаштырырга өндәп, үз гимназиясендә бу эштән беркем дә читтә калмавын, яшь, тәҗрибәсез педагогмы, пенсия көтеп утыручымы -  һәммәсенә дә таләпнең бердәм булуын ассызыклады. Чыннан да, ачык дәресләрне һәр предмет укытучысы, яшенә, категориясенә карамыйча, бөтен осталыгын кулланып әзерләгән. Кунаклар һәр укытучы белән җылы әңгәмә корды, кирәк җирдә киңәшләр дә бирделәр, кул эшләре күргәзмәсе белән таныштылар. Бер-берсенә карата җылы дуслык хисләре тоючы "сингапурчылар" бер-берсен фотоларга төшерделәр, сурәтләрне алдагы очрашуда алмашырга вәгъдәләштеләр.