2017 елның 4 апрель көнне 8 нче санлы “Сандугачым” балалар бакчасы педагоглары мәктәпкәчә яшьтәге балалар арасында регион күләм милли театр фестиваль бәйгесе оештырдылар. Фестиваль–бәйгенең беренче этабында Алабуга, Яр Чаллы, Тубән Кама, Әгерҗе һөм Менделеев шәһәре кечкенә театр осталарының видео язмада чыгышлары каралды һәм тиешле нәтиҗә чыгарылды. Хөкемдарлар исемлегенә бакча хезмәткәрләреннән тыш театр эше осталары да кертелде, аларга 21 театр күренешенә балаларның костюмнарына, образга кереп оста уйнауларына, сәхнә һәм музыкаль бизәлешенә карап тиешле бәя бирү бурычы куелган иде.
Фестиваль–бәйгенең икенче этабы шәһәрнең балалар сәнгать мәктәбе бинасында узды. Килгән кунакларны, катнашучыларны фойеда 8 нче бакча тәрбиячеләре куллары белән ясалган күз явын алырлык, осталар ясаганнан бер дә аерылмаслык (хәтта яхшырак та әле!) театр төрләреннән һәм балалар чыгышын чагылдырган фоторәсемнәрдән күргәзмә көтә иде. Иң яхшы дип сайланган театр күренешләре сәхнәдә видеоязмада һәм балалар чыгышлары белән бәйләнеп барды. Г.Тукай, А.Алиш, Р.Батулла, Р.Вәлиев һ.б. әсәрләренә, рус һәм татар халык әкиятләренә нигезләнеп төзелгән күренешләрне алып баручы Әби, Бабай, оныклары залда утыручыларны чын әкият дөньясына алып керде. 8 нче бакча театр коллективы “Торна белән Төлке” һәм “Шалкан” әкиятләре белән 1 урынга, “Ике ялкау” 2 урынга, “Куян кызы” 3 урынга лаек булдылар. Алабуга шәһәре 31 нче, Менделеев шәһәре 7 нче балалар бакчасы театр коллективлары 5-7 яшьлекләр арасында 1 дәрәҗә лауреат исеменә лаек булдылар.

Кечкенә театр осталарына, оештыручыларга Э.Минигулова район мәгариф булеге исеменнән рәхмәтен белдерде, сокландыргыч күренеш дип атады. 

Фестиваль - бәйгенең төп кунагы, хөкемдарлар рәисе, Татарстанның атказанган артисты, Д.Сираҗиев исемендәге театр премиясе лауреаты, Буа дәүләт театры җитәкчесе Р.Садриев бу көннең искиткеч күренешкә ия булуын ассызыклап үтте, киләчәге дәвамлы булуына ышаныч белдерде, җиңүчеләргә, катнашучыларга дипломнар тапшырды, бәйгене оештырган бакча коллективына уңышлар теләде.

Бакча мөдире Г.Гудовская киләчәктә бу юнәлештә эш дәвам ителәчәген белдерде, җиңүчеләргә һәм барлык катнашучыларга истәлекле бүләкләр, татлы күчтәнәчләр тапшырды.