14 февральдә 2-3 нче сыйныф укучылары һәм аларның әти-бабайлары, абыйлары белән берлектә, “Уңганнан бар да була” бәйгесе үткәрелде. Бәйге татар теле укытучылары Муллагалиева Х.М. һәм Закирова Р. А. тарафыннан татар телендә алып  барылды. Муллагалиевлар, Фаразутдиновлар, Бикбулатовлар, Шарафутдиновлар, Закировлар, Тазиевлар командалары төрле өлкәдә үзләрен сынап карадылар. “Танышу”, “Үз парыңны тап”, “Егет кешегә җитмеш төрле һөнәр дә аз”, “Иҗади эш”, “Курчак төрү”, “Телеңне  йота күрмә”, “Сөйләм осталыгы” этапларыннан торган конкурста балалар да, олылар да бик теләп катнаштылар, төрлечә үзләрен сынап карадылар. Конкурсантлар бигрәк тә сорауларга җавап бирә-бирә акча санау, курчак киендерү, җиләк-җимешләрне бизәү, күзләрне бәйләп, рәсем ясау кебек биремнәрдә  бик актив катнаштылар. Нәтиҗәләрне санаганнан соң, Шарафутдиновлар гаиләсе  “Иң уңган команда” исеменә лаек булды. Барлык катнашучыларга да дипломнар һәм истәлекле бүләкләр бирелде.