Кешенең матурлыгы үз ватанын яратуда, аны һәр минутта сакларга әзер булуда чагыла. Ватанны ярату – аның уңышлары белән горурлану, үз халкыңа файдалы булу дигән сүз. Кешене нәрсә белән кызыксынуыннан, нинди уй – фикерләр белән яшәвеннән, кечкенә генә мәсьәләләрне булса да хәл итүдә ничек катнашуыннан аның батырлыкка әзерлеге күренә.
  Район ветераннар оешмасыннан Бөек Ватан сугышы, тыл ветераннары, ветераннар советы җитәкчесе Талипова Гөлнәзирә Василовна укучылар белән очрашуга килделәр. Түбән Ушмы авылында туып бүгенге көндә Мамадышта яшәүче авылдашыбыз Вазыйх абый яшь чакта, сугышка кадәр тормышын, сугышта булган хәлләр турында сөйләде.

 Авыр, бик авыр еллар булды шул, ул еллар. Ләкин батыр йөрәкле аналар да, 18 яшьләре әле чәчәк атып өлгермәгән яшь кызлар да, куллары ныгып бетмәгән яшь сабый балалар да барыбер түзделәр. Дошманны җиңүгә ышаналар иде бит алар. Әнә шул сихри көч безне яшәтте, авырлыкларга түзәргә өйрәтте, йөрәкләргә түземлек, күңелләргә сабырлык бирде дип сөйләде Миннур апа.
 Афган сугышында катнашкан Яковка авылы егете үзенең Армиядә күргәннәре турында, Совет Армиясе сафларында хезмәт итү - һәр гражданинның изге һәм мактаулы бурычы икәнлеген, Ватаныбызның азатлыгы һәм бәйсезлеге өчен сугышларда халкыбызның тиңдәшсез батырлыклары турында сөйләде.

   Ветераннарга зур рәхмәтләребезне җиткердек, без алар алдында гомер буе бурычлы булуыбызны әйтеп баш идек.

   Ветераннар белән очрашуны авылыбызның яңа “Дан парк”ында, һәйкәл янында, “Дуслык” спорт сараенда дәвам иттек.