“Экологик белем дәресләре”. Бу чара үсеп килүче буынның экология юнәлешендәге белемен арттыру, укучыларда туган як табигатенә сакчыл мөнәсәбәт тәрбияләүне максат итеп куя. Балаларга парта артына утырган беренче көннән үк “Табигать—туган йортыбыз” дип аңлатыла. Ни өчен үсә төшкәч,  алар тирә-якны пычрата башлый соң? Бүгенге көндә табигатебез шундый чиктә, хәтта чаң сугарга вакыт җиткән. 

Безнең Түбән Ушмы урта гомуми белем мәктәбенә экологик белем дәресләренә Татарстан Республикасы экология һәм табигый байлыклар министрлыгы Кама аръягы территориаль идарәсе җитәкчесе Фәләхова Фәүзия Әхмәт кызы чакырылды.

     Башлангыч класс укучылары өчен дәрес уен рәвешендә мавыктыргыч үтте. Балаларның экология өлкә¬сендәге белем дәрәҗәсен сынап карау өчен аларга төрле сораулар бирелде. Шулай, мәсәлән, кәгазь, плас¬тик сыешлыклар, алюминий банкалар, пыяланың һәм машина шин¬нарының “яшәү” срогы турында сорауларга дөрес җавап бирүчеләр күп булды. Атап әйткәндә, пластик сыеш¬лыкның, сыра банкаларының таби¬гатьтә таркалу срогы— 100, пыяланыкы— 1000, йонныкы 1 ел. Уйлап карасаң, күпчелек очракта моның өчен бер кеше гомере генә җитми. Фәүзия Әхмәт кызы балаларга чималны икенчел эшкәртү турында сөйләде. Макулатурадан, пластик сыешлыклардан нинди продукция чыгарылганын конкрет әйберләр мисалында сөйләп күрсәтте. Шулай ук бу өлкәдәге чит ил тәҗрибәсе белән таныштырып үтте. Ул балаларда бик күп сораулар тудырды. Ни өчен, мәсәлән, чит илдә тәмәке төпчеге ташлаган өчен дә зур-зур штрафлар салына. Ә бездә машина белән чүп китереп аударсалар да, без моңа игътибар итмәскә дә мөмкин. Чыннанда, балаларга белем бирү—бер, ә мәктәп бусагасыннан чыгу белән алар чынбарлык белән күзгә-күз очраша. Болар турында законнар да булуын, аларның тормышка ашырылуын контрольдә тотучылар да бар икәнлеген искәртте.Чыннан да, барыбызда табигать кочагына чыгып саф һава суларга яратабыз. Әмма кайбе¬рәүләр үзләреннән соң тау кадәр чүп өемнәре калдыра. Монда кешеләрнең аңын һәм җәм¬гыятьнең моңа карашын үзгәрт¬мичә, экологик проблемаларны ныклап аңламыйча һәм һәр кешенең катнашлыгыннан башка килеп туган хәлне төзәтеп булмаячак.

Югары класс укучылары “Экологик белем  дәресләре”ндә әлеге темага өстәмә мәгълүмат алу өстенә, экология буенча үзләрен борчыган проблемалар турында да сөйләштеләр, хәлне яхшырту максатында тикшеренү эшләре алып барырга, үз проектларын эшләргә дигән уртак фикергә килделәр.