Русия Федерациясе Дәүләт флагы көнен билгеләү ил Президентының 1994 елның 20 августындагы указы нигезендә гамәлгә куелды. Нәкъ менә 1991 елның 22 августында Мәскәүнең Ак йорты өстенә беренче тапкыр өч төсле тарихи Русия флагы күтәрелде. Дәүләт символларына ихтирамлы караш һәрберебездә гражданлык һәм патриотик үзаң формалаштыра, Ватанга мәхәббәт хисе уята.
Бүген илебез динамик үсеш юлында, дөньяның бөек дәүләте статусын кайтара. Хәзер безнең дәүләт флагын Җир шарының барлык почмакларында да беләләр. Андагы һәр төс үзенә күрә бер мәгънәгә ия: ак – азатлык һәм бәйсезлекне, зәңгәр – ышаныч һәм рухиятне, кызыл бөеклек һәм куәтне гәүдәләндерә. Әлеге сыйфатлар безнең җәмгыятьне берләштерә, илнең бердәмлеген һәм бөтенлеген чагылдыра.