Бүген барлык сыйныфларда да тәмәкегә,алкогольгә каршы профилактик чараларга багышланган класс сәгатьләре узды.Сыйныф җитәкчеләре әлеге тискәре гадәтләрнең зыяны һәм төрле авыруларга китерүче сәбәпләр турында сөйләделәр. 

Бүген иртәнге линейкада физик тәрбия укытучысы Зиганшин Ф.Г. мәктәбебезнең 3 укучысына тантаналы рәвештә ГТО значоклары һәм таныклыклар тапшырды.

Бүген башлангыч сыйныф укучылары район мәдәният йортына курчак театры карарга бардылар,ә аннан соң сәламәтлекләрен ныгыту өчен бассейнда булдылар.Көн күңелле һәм файдалы узды, укучылар күтәренке кәеф белән кайттылар. 

Белем дәрәҗәсен ачыклау максатыннан, 12,13 ноябрьдә инглиз теле, математика һәм тарих буенча 8 нче сыйныф укучыларына диагностик тест үткәрелде.

2019 елның 5-18 ноябрендә мәктәп укучылары өчен «Зур мәгълүматлар» темасына Бөтенроссия Белем бирү чарасы "Саннар дәресе" уза. Бу гадәти булмаган информатика дәресләре булачак, алар Саклык банкының мәгълүматлар аналитикасы буенча белгечләр тарафыннан әзерләнгән. Дәрес 1-11 нче сыйныф укучыларына адреслана, ул укучыларда цифрлы икътисадның төп компетенцияләрен үстерүгә, шулай ук мәгълүмати технологияләр өлкәсендә алга таба эшчәнлек алып бару өчен аларның һөнәри юнәлешенә юнәлдерелгән. Мәктәбебез укучылары да әлеге чарага зур кызыксыну белән катнашалар һәм сертификатлар да алалар.

Муса Җәлил халкыбызны бар дөньяга танытыр өчен бирелгән олы бүләктер кебек. Үлеме белән үлемсезлек яулаган бу тиңдәшсез бөек шәхес исеме һәм аның шигырьләре төрле телләрдә яңгырый бүген. Районыбызның  үткәрелгән II Халыкара “Җәлил укулары”нда мәктәбебезнең активистлары да катнашты һәм Гобәева М.(җитәкчесе Минһаҗева Л.Т.),Сабирова И. (җитәкчесе Садриева А.З.) дәрәҗәле урыннар  алып зона турына үттеләр. Афәрин, укучылар! Туган телебезне, милләтебезне киләчәктә дә яшәтеп калу турында уйланган бүгенге заманда милләтебезнең рухи аңын уятырга ярдәм итә торган мондый бәйгеләр бик кирәк диеп уйлыйбыз.

Көзге каникуллар бетеп 2 нче чирек тә башланып китте.Укучылар көч-дәрт туплап яңа чиреккә аяк бастылар. Әлеге чиректә укучыларыбызга күп көч кирәк булачак,чөнки Бөтендөнья фән олимпиадаларының район этабы башланып китәчәк.Укучыларга да, укытучыларга да уңышлар телибез!

Бүген Татарстан Республикасы Конституциясенә 27 ел. 126 маддәдән торган төп законыбыз 1992 елның 6 ноябрендә кабул ителә. Конституция Татарстан халкының барлык мәнфәгатьләрен үз эченә туплап, өмет-хыялларын чагылдыра, киләчәккә ышанычын беркетә.

4 ноябрь - Халыклар бердәмлеге көне. Бу бәйрәмнең тарихы ерак гасырларга барып тоташа. Ул тынычлык, иминлек, бәйсезлек өчен бердәмлек символын чагылдыра. Әйе, уртак көч булып туплансак, авыр чакта бер-беребезгә ярдәм кулы сузсак, җәмгыятебездәге вакыйгаларга битарафлык күрсәтмәсәк, төрле дин һәм милләт халкына, аларның гореф-гадәтләренә хөрмәт белән карасак, без - көчле халык.

Мәктәбебездә ОГЭ га әзерлек тулы көченә бара. Бүген 9 нчы сыйныф укучылары  рус теле һәм әдәбияты укытучысы Садриева А.З белән  изложение язу күнекмәләре өстендә эшләделәр.