Һәр елны 26 апрель көнне без татар халкының горурлыгы булган бөек шагыйребез Габдулла Тукайның туган көнен билгеләп үтәбез. Габдулла Тукай туган көн – Туган тел көне ул. Башка бәйрәмнәр һәм истәлекле даталар белән беррәттән, бу көн һәркайсыбызның күңелендә аерым урын биләп тора. Бу көнне башкалабыз Казанда Тукай һәйкәле янында, Республикабызның барлык районнарында, Рәсәйнең татарлар яшәгән барлык төбәкләрендә дә шигырь бәйрәме үткәрелә. Безнең Алимов Зариф исемендәге Яңа Кәкерле төп гомуми белем бирү мәктәбе дә елның-елында бу чарадан читтә калмыйлар. Тукай шигырьләрен кабат хәтерләрендә яңарталар, аның сүзләренә иҗат ителгән җырларны җырлыйлар, шагыйрь турында язылган мәкаләләрне укыйлар.

    “Туган телеңне онытсаң, рухыңны югалтырсың…”– дип язган бит шагыйребез. Туган телен белмәгән кеше үз халкыннан да, милли тамырларыннан да аерыла, туган җиренә дә ят була. Без күпмилләтле илебездә төрле телләрнең һәм үзенчәлекле диалектларның байлыгын һәм аһәңен саклап калырга тиешбез. Туган тел көне һәрвакытта да тынычлык, дуслык һәм татулык бәйрәме булсын!