Соңгы вакытта вакытлы матбугат басмаларында, радио-телевидение тапшыруларында һәм интернет челтәрендә "ислам дәүләте", "ИГИЛ" төшенчәләре еш очрый башлады. Дөньякүләм масштабта террорчылык куркынычының кискен үсеп китүе, әледән-әле кабатланып торучы террор актларда  бер гаепсезгә һәлак булган меңләгән кешеләр, Сирия дәүләтендә баручы гражданнар сугышы - болар барысы да атап кителгән террористик төркемгә һәм аның эшчәнлегенә кагыла. ИГИЛдан безгә нинди куркыныч яный? Ни өчен әлеге төркем вәкилләре үз сафларына дөнья буйлап яшь кешеләрне җәлеп итәргә тырышалар? Бу танылмаган дәүләт, яки террор төркем әгъзалары нинди максатларга ирешергә телиләр? Аларны кемнәр финанслый? ИГИЛ контрольлек иткән территорияләрдә җирле халык нинди тормышта яши?

Шушы һәм темага кагылышлы бик күп кенә башка сорауларга җавап бирү максатыннан Туймәт төп белем мәктәбенең 5 - 9 нчы сыйныф укучылары белән ачык сыйныф сәгате үткәрелде. Бу чараны тарих укытучысы Сәүбанова З.М. әзерләде. Ул ИГИЛ террор төркеменең барлыкка килү тарихыннан башлап, бүгенге көнгә кадәрге эшчәнлеге белән балаларны таныштырды. Ни өчен бу төркемнең дөньяда беркем тарафыннан да дәүләт буларак танылмавын,  үзләренең максатларына ирешү өчен ИД вәкилләре нинди алымнарны кулланалар? Укытучы үзенең чыгышында бу җитди темага караган барлык үзенчәлекләрне дә күрсәтергә тырышты. Шикле эшчәнлеккә тартырга, ачыктан-ачык террор төркемгә керергә чакырган, акча белән кызыксындырып, җинаятькә этәрергә тырышкан кешеләр белән үз-үзеңне ничек тотарга кирәклеген өйрәтте, компетентлы киңәшләрен бирде.