Ноябрьдә  Чирмешән районында традицион Ислам айлыгы игълан ителде. Шул уңайдан 13 ноябрь көнне Туймәт авылы мәдәният йортында зур күләмле, тирән тәрбияви мәгънәгә ия булган чара үтте. Район администрациясе вәкилләре, җирле һәм район югарылыгындагы дин әхелләре белән берлектә авыл җыены булды. Очрашу барышында килгән кунаклар традицион Ислам айлыгы үткәрүнең максатлары белән таныштырдылар.  Соңгы вакытта дөньядагы  ислам диненә кагылышлы күп кенә бәхәсле фикерләргә ачыклык керттеләр. Дин исеме белән ышыкланып террорны пропагандалаган һәм тормышка ашыру өчен бар нәрсәгә дә әзер булган җинаять төркемнәре турында да, шул юнәлештә үсеш алырга теләгән Ислам дәүләте турында да сөйләделәр вәкилләр. Авыл эчендә чит-ят кешеләр йөргәндә нинди чаралар күрергә тиеш булуыбызны аңлаттылар. Дин кануннары кушканча яшәү, әхлаклылык, кешелеклелек темасына кагылышлы видеофильмнар күрсәтелде.