"Балалар - җәмгыятьнең булачак гражданнары. Бу җәмгыятьтә аларның кыйммәте хезмәттә ни дәрәҗәдә катнаша алулары һәм бу хезмәткә ни дәрәҗәдә әзерлекле булуларына карап билгеләнәчәк", - дип язып калдырган А.С.Макаренко. 

7 нче сыйныф укучылары һәм аларның әти-әниләре белән берлектә "Гаилә традицияләре һәм балага хезмәт тәрбиясе бирү" темасы астында ата-аналар җыелышы узды. Сыйныф җитәкчесе Кадрия Ильяс кызы әти-әниләрдән һәм укучылардан сораулары чагыштырмача бер мәгънәдә булган анкеталар тутыртты, төрле ситуацияләрдә чыгу юлларын таптырды һәм бергәләп анализ да ясалды. Беренче чирек йомгалары һәм 2014-2015 нче уку елының дүртенче чирек нәтиҗәләре арасындагы уңай һәм тискәре үзгәрешләргә тукталды, әти-әниләрне дәресләргә чакырды. Шулай ук Мәгариф һәм Фән министрлыгы тарафыннан алыначак контроль эшләр  белән дә таныштырды.

Тәрбиянең кайсы гына өлкәсен алып карасаң да, ул хезмәт белән тыгыз бәйләнгән. Аң-белем алу, үзеңдә әхлаклылык һәм эстетик тәрбия нормаларын булдыру, ихтыяр көче тәрбияләү - болар барысы да кешенең тырыш хезмәт нәтиҗәсе. Бүгенге җыелышыбызның максаты да - баланың хезмәттә һәм укуда ирешкәннәрен күрү һәм алга таба эшлисе эшләрне билгеләү иде, дип сүзен тәмамлады сыйныф җитәкчесе.