Бүген Туймәт төп белем мәктәбендә Бөек Җиңүнең 70 еллыгын каршы алу уңаеннан 5 - 9 нчы сыйныфлар өчен чираттагы чара үтте. "Хәтер китабына сәяхәт" дип аталган сыйныфтан тыш чараны тарих укытучысы Сәүбанова Зилә Мингата кызы оештырды. Ул балаларга Чирмешән районының Хәтер китабы турында, аның эшләнү тарихына, эчтәлегенә кагылышлы бик күп мәгълүмат бирде. Шушы китапка кертелгән, сугышта һәлак булып калган 78 авылдашыбызның исемнәрен атады, укучылар белән бергә аларны искә алды. Чараның ахырында барлык катнашучылар "Киләчәктә сугыш булмасын, балаларның күз яше түгелмәсен, ятимлек ачысын татырга язмасын иде" дигән теләктә калдылар.