Бүген Туймәт төп белем мәктәбендә чираттагы ата-аналар җыелышы үтте. Җыелышта район вәкиле - полиция капитаны, ПДН ның өлкән инспекторы Мөбәрәкшина Чулпан Җәүдәт кызы да катнашты.

Тормыш  - ул кешегә бары тик бер генә тапкыр бирелә торган мизгел, илаһи бүләк. Беркемнең дә гомере агымсулар кебек шома гына акмый, кайвакыт киртәләргә дә очрый. Ләкин һәрберебезнең тормышы үз кулында. Әлеге бүләкне ничек итеп куллану, нинди эчтәлекле маҗараларга баету - һәркемнең үз эше. Үз тормышыбызны дөрес юлдан алып бару, аны бары тик якты мизгелләр белән генә баету - һәркемнең үз кулында. Өлкән инспектор Чулпан Җәүдәт кызы әти-әниләр каршында искиткеч мәгънәле, үтемле чыгыш ясады. Ул яшүсмерләр арасындагы хокук бозуларны кисәтү һәм булганнарын киметү өстендә алып барылган эш, Татарстан Республикасының 71 нче законының төгәл үтәлеше, балаларның юлдагы куркынычсызлыгын тәэмин итү буенча район һәм республика югарылыгындагы мисаллар белән ныгытып сөйләде. Шулай ук соңгы вакытта киң таралып киткән социаль мошенниклардан үз-үзеңне яклау юлларын да күрсәтте полиция хезмәткәре. Әти-әниләр хокук сакчысына үзләрен кызыксындырган сорауларын бирделәр.

Җыелышта икенче көн тәртибе буенча ашханәдә туклану мәсьәләсе, ә өченче көн тәртибе буларак 3 нче чирек нәтиҗәләре каралды.