Бүген Туймәт төп белем мәктәбендә үзенчәлекле һәм эшлекле очрашу булды. 8 - 9 нчы сыйныф укучылары  һәм аларның әти-әниләре белән кара-каршы сөйләшү өчен район вәкилләре Хөснуллин Роберт Рәсим улы һәм Миргалимов Илдар Гайсә уллары килде. Очрашуның темасы "Балаларга профориентация юнәлеше бирү". Соңгы елларда яшьләр һөнәр сайлауда мөмкинлекләрен һәм сәләтләрен истә тотып түгел, ә билгеле бер модалы тенденцияләрне күз алдында тотып эш итә башладылар. Шул сәбәпле илдә югары белемле яшьләр күп, ләкин реаль профессия үзләштереп, җитештерү тармакларында хезмәт куючылары сирәгәя бара. Ә бит ил икътисадының нигезен сәнәгать үсеше тәшкил итә. Эшче һөнәр ияләре һәрвакыт кирәк. Район вәкилләре әти-әниләргә җентекле рәвештә шул турыда сөйләделәр. Үз тормыш тәҗрибәләреннән чыгып укучыларга һөнәр сайлауда нинди факторларга таянып эш итәргә кирәклеге хакында киңәшләрен бирделәр. Шулай ук район үзәгендә урнашкан Норлат аграр техникумының филиалында профессиональ белем алу шартлары  белән дә таныштырдылар.