15 февраль -  хезмәт бурычын Ватаннан читтә үтәгән россиялеләрне искә алу көне. 1989 елның 15 февралендә Әфганстаннан Совет гаскәрләре чыгарылалар. Әлеге датаны билгеләп үтү, интернационал бурычын үтәгән авылдашларыбызның тормышын өйрәнү, аларның батырлыгына тиңләшергә тырышу максатыннан Туймәт төп белем мәктәбендә бүген тантаналы линейка үтте.  Мәктәп директоры Шәрифуллина Рәзилә Вәлиәхмәт кызы үзенең чыгышында бу көннең тарихи әһәмияткә ия булуы хакында, тыныч тормышта да сугыш куркынычы белән йөзгә-йөз очрашырга туры килгән якташларыбызның үткәнен күбрәк белергә кирәклеге турында сөйләде. Район буенча яшәгән 66 "әфганчының" күбесе төрле дәрәҗәдәге дәүләт бүләкләренә лаек булганнар. Шулар арасында авылдашыбыз Сәгыйров Рәмил Назыйм улы "Кызыл йолдыз" ордены белән бүләкләнгән.