Рәхмәт сезгә, рәхмәт авылдашлар,

Рәхмәт сезгә яңа буыннан

Май гөлләре чәчәкләнгән чакта,

Соңгы фашист илдән куылган.

Килмешәкләр өчен ил капкасын

Мәңге ачылмаска яптыгыз.

Сүнмәс нинди хәтәр җилләрдә дә

  Сезнең гомер, сезнең яктыгыз!

   9 нчы сыйныф укучылары сыйныф җитәкчеләре Сәгыйрова Л.М. белән бергәләп Бөек җиңүнең 70 еллыгына багышланган альбом төзиләр. Бу альбомда укучылар үзләренең бабаларының сугыш кырларындагы батырлыкларын, тылда күрсәткән ару-талусыз хезмәтләрен чагылдыралар. Сугыш күренешләре рәсемнәре, иншалар белән тулыландыралар.

   Бөек Ватан сугышы беткәнгә 70 елга якын вакыт узса да, сугыш хатирәләре тоныкланмый. Дошманга күкрәк киереп каршы торган, изге җиребезне саклап калган, аның иминлеге өчен гомерләрен дә кызганмаган каһарманнар һичкайчан онытылмас. Җиңү бәйрәмнәре тагын шаулап узар. Ләкин кешеләр йөрәгендә сугыш калдырган яралар һаман да сыкрый шул әле. Без халкыбызның сугышта күрсәткән батырлык һәм фидакарьлекләрен, зур югалту һәм корбаннарын һич кенә дә истән чыгармаска тиешбез. Безнең авылдашларыбыз , бабаларыбыз бу сугыш афәтенең тере шаһитлары булганнар.  Яшли сугышка китеп, алгы сызыкта булулар, әсирлек җәфалары кичерүләр, ачлык, салкын окопларда өшүләр, яныңда ук ату, шартлау, иптәшләреңнең үлүе ...  Сугыш истәлекләре белән танышканда алар барысы да тере картина булып күз алдыннан уза. Һәркем, бу аяусыз сугыш вакыйгаларын күз яшьләрсез генә сөйли алмый. Ә сөйләргә кирәк. Яшь буын сугыш фаҗигасенең тирәнлеген аңласын; ирекнең, муллыкның кадерен белсен, күкнең аязлыгы өчен башларын салган сугыш корбаннарына рәхмәтле булсын өчен, аларны сугыш истәлекләре белән һәрвакыт таныштырып торырга кирәк.