27 нче гыйнвар - Ленинград блокадасы өзелгән көн буларак тарихка кереп калды. Төп-төгәл - 871 көн дәвам иткән әлеге мәхшәрнең кайтавазы бүген дә үзен сиздереп тора. Ленинград блокадасы 2 миллионнан  артык кешенең гомерен кисә. Бүгенге көндә Казаныбызда 230 дан артык Ленинград блокадасы ветераны гомер кичерә.

Шуларның берсе Александр Федорович Стручков. Аның яшь буынга теләге мондый: "Бу тормышта күпне күргән кеше буларак шуны әйтәсем килә: хәзерге тормышыбыз җәннәткә тиң. Хәзер бит бөтен нәрсә дә бар. Урамга чыксак - аяз күк йөзе, иң мөһиме - тынычлык. Сез, яшьләр, без күргән михнәтләрне күрмәвегез белән бәхетле. Хәзерге тормышны сусыз, җылысыз, яктылыксыз, ризыксыз күз алдына да китерә алмый торгансыздыр..." Менә шушындый тетрәндергеч вакыйгаларны 6 нчы сыйныф укучылары үзләренең сыйныф сәгатендә бер-берләренә сөйләделәр. Презентация дә күрсәттеләр. Укучылар! Әгәр сез тыныч өйдә яшисез,  иркен мәктәпләрдә укыйсыз, айлы кичтә үзегезнең дусларыгыз белән серләшеп утырасыз икән, белегез - бу җирдә сезнең матур яшәвегез өчен меңләгән солдатларның каны түгелгән. Бу тормышның кадерен белегез, кадерле балалар!