Татар милләте дөньяның кайсы төбәгендә яшәсә дә, үз телен, мәдәниятен, гореф-гадәтләрен сакларга һәм үстерергә, үткәнен барларга тырыша, тарихи шәхесләре алдында баш ия. Халкыбыз тарихында үзләреннән тирән эз калдырган, исемнәре буыннардан-буыннарга күчеп килгән бөек шәхесләребез бик күп. Кояш Тимбикова - шундыйларның берсе. Бүген дә без аның исемен зурлыйбыз һәм изге эшләреннән үрнәк алырга тырышабыз. 19 нчы ноябрьдә Чистай шәһәренең 2 нче гимназиясендә Кояш Тимбикова исемендәге яшүсмерләр фәнни-тикшеренү укуларының зона туры узды. Безнең мәктәптән дә 8 нче сыйныф укучысы Рәҗәпов Ренат Рәшит улы үзенең "Без шул төбәктән..." темасына эзләнү эшен яклады һәм сертификат белән бүләкләнде. Бу җыенның ел саен уздырылып, озын гомерле булуын һәм татар теле һәм әдәбиятын, туган якны сөюче укучыларыбызның иҗади сәләтләрен үстерүгә үз өлешләрен кертүен  телибез. Оештыручыларга рәхмәтебезне белдерәбез.