Чәршәмбе көнне районның үзәк китапханәсендә татар теле һәм әдәбияты укытучылары, мәдәният хезмәткәрләре, китапханәчеләр катнашында бик мөһим җыелыш узды. Телебезне, халкыбызның мәдәниятен һәм сәнгатен, динен, гореф-гадәтләрен, йолаларын саклап калу, аны үстерү өстендә әледән-әле чаралар үткәрелеп тора. Татар халкының киләчәген саклап калырдай яшь буынны тәрбияләү безнең бурычыбыз. Шушы бурыч-максатларны тормышка ашыру өчен мәктәпләрдә әдәби түгәрәкләр эшләп килә. Түгәрәктә татар теле һәм әдәбиятын сөюче укучыларыбыз шөгыльләнә. Әлеге татар конгрессын оештыручылар: оешманың рәисе Гомәров Кадыйр Шакир улы, Долгополова Рәмзия Шакир кызы, мәгариф бүлеге җитәкчесе Хаматкамиль Шамил улы белән берлектә бүгенге көн яшьләре белән эшләүнең төрле юллары каралды, планы төзелде, яңа состав сайланды. Оешманың рәисе итеп Гатин Шәүкәт Фатыйх улы бертавыштан сайланды, ә ярдәмчеләре: татар теле һәм әдәбияты укытучысы Гайнетдинова Мөслимә, "Безнең Чирмешән" газетасы хезмәткәре Гомәров Марат һәм Чирмешән мәчете имам-хатыйбы Хәбир хәзрәт Хановлар сайланды. Яңа эшләргә рухландырган татар конгрессы килгән кунаклар күңеленә дә хуш килде.