9  май - Бөек Җиңүнең 69 еллыгы уңаеннан Туймәт авылы җирлегенең олысы-кечесе "Билгесез солдат" һәйкәле янына сугышның барлык авырлыкларын үз җилкәләрендә татыган, шатлыклары һәм кайгылары булган, олы тормыш юлы үткән хөрмәтле кешеләребез, тыл, хезмәт һәм  сугыш ветераннары белән очрашуга җыелды. 

Ватаныбыз, фашистлар белән сугышта бик күп кызын һәм улын югалта. Туймәт авылыннан сугышка киткән 200 дән артык кешенең 78 се яу кырында мәңгелеккә ятып кала. 

Үлем. Сугыш китте. Кешеләр җиңел сулап куйды. Ләкин... бөтенләйгә түгел. XXI гасырга аяк басканда дөньяның төрле илләрендә хәрби низаглар дәвам итә. Әфганстанда, Чечняда, башка "кайнар нокталар" да барган сугышлар күпме әти-әнине кайгыга салды, никадәр яшь гомерне өзде.

Туган авылыбыз Туймәттән дә лачын кебек ир-егетләребез Әфган, Чечня җирләрендә барган сугышларда катнашты. Туган ил өчен хезмәт иткәндә авыр яраланып, бүгенгесе көндә дә ул яраларның тынгы бирмәвн беләбез. Бу батыр егетебез, авылдашыбыз, Кызыл Йолдыз ордены кавалеры Сәгыйров Рәмил Назыйм улы. Без, яшь буын, аларны онытырга тиеш түгелбез. Аларның батырлыгына баш иябез, аларга мәңгелек дан!

Берлингача барып җитеп,

Фашистларны тар-мар итеп, 

Илгә җиңү китергәннәр, 

Рәхмәт Сезгә, 

Рәхмәт Сезгә, ветераннар!

Буыннардан-буыннарга

Күчә барыр Сезнең даннар...

Рәхмәт Сезгә,

Рәхмәт Сезгә, ветераннар!