Туймәт төп белем мәктәбе каршында оешкан тимурчылык командалары даими рәвештә өлкән авылдашларына, тыл һәм хезмәт ветераннарына ярдәм итеп торалар. Укучылар җитәкчеләре белән берлектә үз сыйныфлары белән дә ялгыз әбиләрнең хәлен белешеп, күңелләрен күтәреп, йорт тирәсендә кулдан килгән кадәр булышып йөриләр. Әле шушы көннәрдә дә 6 нчы сыйныф укучылары Вәлиева Ралия апалары белән тыл ветераны, озак еллардан бирле урын өстендә ятучы Ишмәхәммәтова Тәзкирә әби янына хәл белергә бардылар. Соңгы елларда исәнлеге аркасында кеше белән аралашуы сирәгәйгән Тәзкирә әби өчен балаларның килүе зур шатлык булды. Ул үзенең гомер истәлекләрен сөйләп, тормыш юлында очраган шатлык-кайгыларын бүлешеп, балаларга килүләре өчен чиксез рәхмәтләрен җиткерде. Мондый очрашулар укучылар өчен дә әхлакый яктан зур файда китерә. Алар һәр кешенең олыгайгач ярдәмгә мохтаҗ булуын аңлап, шуңа да аларга мөмкин кадәр күбрәк  игътибар бирергә кирәк икәнлеген күреп үсәләр.