Туймәт мәдәният йортында урнашкан авыл китапханәсенең ишекләре бикләнеп тормый. Төрле яшьтәге кешеләр, үз мәнфәгатьләрен, кызыксынуларын канәгатьләндерер өчен шунда киләләр. Мәктәп балаларының да яраткан урыны ул - авыл китапханәсе. Шушы көннәрдә 1, 3 нче сыйныф укучылары китапханәгә чираттагы экскурсиягә бардылар. Китапханәче Галимова Наҗия Мөхәррәм кызы балалар белән "Изгелек юлыннан" дигән темага үтемле һәм кызыклы әңгәмә үткәрде.  Укучылар да укыган китаплары буенча үз белемнәрен күрсәттеләр, яңа энциклопедик белемнәр дә тупладылар. Очрашудан барысы да канәгать калдылар.