Яшь буынны тәрбияләүгә татар әдәбияты зур өлеш кертә. Ул укучыны игътибарлы булырга, кеше күңелен яраламаска, җәмгыятьтә үз урынын табарга өйрәтә. Театр сәнгатенең могҗизалы көче дә үзенең тамашачысын да, укучысында иң матур хисләр тәрбияләвендә. 9 нчы апрельдә район мәдәният йортында Габдулла Кариев исемендәге яшьләр театры Туфан ага Миңнуллинның "Нигез ташлары" исемле моңсу комедиясен үзенең тамашачысына тәкъдим итте. Театрда ата-ана нигезен, татар телен онытмау, милләтне яшәтү, тирә-юньдәгеләргә игътибарлы, мәрхәмәтле булу, алкоголизмның куркыныч авыру булуы, шулай  ук оптимальләштерү, мәктәпләрнең бүгенге хәле турында, милли йолаларны хөрмәт итү проблемалары күтәрелде. Юкка гына: "Театр көлдерәдер, елмайтадыр ..." димәгәндер шул бөек Тукаебыз. Ике сәгать дәвамында артистлар көлә-көлә еларга,  елый-елый көләргә мәҗбүр иттеләр. Искиткеч матур, бай, мәгънәле сәхнә әсәре бүләк итеп калдырган безгә Туфан ага. Без - тамашачылар менә шундый нәтиҗәгә килдек: театр - рухи тәрбия бирә, Ватанга, туганнарына  мөнәсәбәтне дә, төрле яктан белемле булуны да, милли гореф-гадәтләргә, хәзинәләргә сак карашны да, хөрмәт итүне дә, өйрәтүне һәм башкаларны да күздә тота.