Соңгы елларда халкыбызның милли традицияләренә, изге йолаларына, гореф-гадәтләренә, гүзәл бәйрәмнәренә игътибар арта бара, аларны халыкчанрак, җанлырак итүгә, көнкүрешебезгә кайтаруга омтылыш көчәя бара. Бу өлкәдә Туймәт төп белем мәктәбе коллективы да әледән-әле чаралар, очрашулар, кичәләр уздырып тора. Татар теле һәм әдәбияты атналыгы да  укучыларда иҗат культурасы, милли горурлык, милли хисләр мәдәниятен тәрбияләү максаты күз тотып оештырылды. Атналык дәвамында оештырылган чаралар укучыларга уңай тәэсир итеп, аларның сәләтләрен ачарга, туган-үскән җиргә, туган телгә мәхәббәт тәрбияләп, фикерләү сәләтләрен үстерүгә ярдәм иткән булса, без, татар теле һәм әдәбияты укытучылары, үзебезнең бурычыбызны үтәдек дип санарбыз.