17 көн барышында бөтен дөнья халкы Сочида үткән XXII нче Кышкы Олимпия уеннарын күзәтте. Кемнәрдер турыдан-туры стадионнарда һәм боз ареналарында, ә кемнәрдер зәңгәр экраннар каршында үз ватандашлары өчен көч биреп, җиңүләренә чын күңелдән шатланып, уңышсызлыкларына спортчылардан ким булмаган дәрәҗәдә көенеп яшәделәр. Дөньякүләм тарихи әһәмияткә ия булган әлеге уеннарда 88 дәүләтнең спортчылары  осталыкларын күрсәттеләр, үзара көч сынаштылар һәм халыкара дуслык мөнәсәбәтләренә үз өлешләрен керттеләр. 

Россия өчен Олимпия уеннары аеруча истә калырлык булды.  33 медаль белән Россиянең җыелма командасы беренче урынны яулауга иреште. Алар арасында 13 олимпия чемпионы, 11 көмеш һәм 9 бронза призерлары. Россия, аерым әйткәндә Сочидагы уеннарны үткәрү өчен җаваплы булган оештыру командасы журналистлар, тренерлар, спортчылар, җанатарлар һ.б. бик күп кешеләр тарафыннан югары бәяләнде. Безнең дәүләт үзенең бердәм, дус, тату һәм көчле булуын тагын бер тапкыр исбатлады.